FilipinoPoems
Magulang
Magulang kong mahal,
Kayo ay marangal.
Biyaya ng Maykapal,
Bilang aking parangal.
Ang pagmamahal ko sa inyo'y walang katumbas,
Kahit magkalayo tayo ng landas.
Sa akin, kayo ay mag-iiwan ng bakas.
Iisipin ko kayo kahit ang mundo'y magwakas.
Magulang ay nagbibigay ng gabay.
Pagsubok man, sila ang alalay.
Tagumpay ko ay aking inaalay
Kaya ako'y nagmamahal ng tunay.
Sa kanilang pinakitang kabutihan,
Mananatili ito sa aking isipan.
Sa bawat pagod na pinapasan,
Sila ang daan sa aking kinabukasan.
Salamat sa bigay ng Panginoon
Kung saan sa mundo kayo'y naaayon.
Ang tulang ito ay aking tugon
Sa mga payo na inyong binaon.
(akda ni Ezar Co ~ Abril 23, 2015)
___________
Heneral Luna
Isang matapang na mamamayan,
Handang lumaban para sa bayan
Sa bawat pagsubok at digmaan,
Upang ang tagumpay ay makamtan.
Sa kanyang ibinatong salita,
"Para kayong birheng naniniwala
Sa pag-ibig ng isang puta."
Aral ay 'wag agad magtiwala.
Kanyang mga salitang sinabi,
Kalaban natin ay sarili.
Ang takot natin ay isantabi.
Sa bayan, dapat tayo'y magwagi.
Bilang paghihiganti sa kanya,
Binaril, sinaksak ng espada.
Tapang nasa kanyang alaala.
Muli, siya si Heneral Luna
(akda ni Ezar Co ~ Nobyembre 5, 2015)
___________
Ina
Mahal kong ina,
IKaw ay dakila.
Huwarang nilikha
Bilang tagapag-alaga.
May taglay na kasipagan
Sa paglinis ng kapaligiran.
Tiyak uunlad ang bayan
Sa makikitang kalinisan.
Sa bawat sangkap ng pagkain,
Pag-ibig mo'y iyong inihahain,
At ito'y iyong isinasalin
Sa aming isip at damdamin.
Kahit kami ay pasaway,
Ika'y laging gumagabay
sa daang aming nilalakbay
Patungo sa masaganang buhay.
Paggalang at kapanutuhan,
Binahagi mo sa loob ng tahanan.
Ikaw ang tanglaw ng kabutihan
Na 'yong itinatatak sa aming isipan.
Ako'y nagmula sa iyong haplos
Pinalaki mo ako ng maayos.
Pag-ibig mo'y iyong ibinuhos
Kaya minamahal ako ng lubos.
Dakilang ina,
Ubod ng ganda.
May sipag at tiyaga.
Ikaw ang bunga sa sanga.
Umaga at gabi,
Ikaw ay nasa aming tabi.
Kaligayahan mo'y kami.
Magkakasama tayo palagi.
Sa pag-alon ng bughaw
At pagsikat ng dilaw,
Liwanag ay nasa ilaw.
Ilaw ay tanging ikaw.
Salamat, aking inay,
Sa mga bagay na iyong binigay.
Subalit, tula ang aking maibibigay.
Bilang pagmamahal kong tunay.
(akda ni Ezar Co ~ Mayo 10, 2015)
___________
Ang Mundo Na Ating Ginagalawan
Kay ganda ng umaga.
Ang kape ay ating kasama
Sa mga araw na maginhawa.
At minsan, ito'y nagpapaligaya.
"Alas siyeta y medya na!
Ako'y mahuhuli na sa opisina.
Nais ko na maghanda,
Mukhang araw ko'y masisira."
"Alas otso na,
Mukhang wala pa ang aking kasama.
Nasaan na sila?
Ang talakayan ay magsisismula na!"
Makalipas ang ilang oras,
Araw ay muling magwawakas.
Oras na para ako'y lumabas
Upang ako'y maka-uwi at magtrabaho muli bukas.
Sa paglabas ko,
Ang mga gusali'y kay ganda ng anyo.
Paligid ay napupuno ng tao
At mga sasakyan sa malayo.
Hay! Ang simoy ng hangin,
Tilay'y sarap yakapin.
Ilaw ay nagbibigay pansin
Para bang may gustong sabihin.
Maraming bagay na tumatakbo sa ating isipan.
Minsan, ang pighati ay 'di maiwasan.
Ngunit ito ang ating kalikasan,
At ito ang mundo na ating ginagalawan.
(akda ni Ezar Co ~ Hunyo 20, 2018)
___________
Ang Pag-asa Ng Pagbabago
O, agila
Kawangis na nilikha
Bilang ibong pambansa
Sa bayang malaya.
Ikaw ang mata ng Pilipino
Upang makita ang dapat mabago
Sa kalikasang ginago
Nga mga alibughang tao
Maging mapanuri at mapagmatiyag
Sa mga babagay na nilayag
Ng ating kalikasang dilag
Tila ba'y humihingi ng habag?
Maliwanag na tala
May taglay pang pag-asa
Sa mga taong umaasa
Na maibalik ang bagong umaga.
(akda ni Ezar Co ~ Hunyo 28, 2018)
___________
Retrato
Kahit saan at magpakailanman,
Lugar ay ' di maiwan-iwan
Sa pagkuha ng larawan
Bilang alaala na 'di malilimutan.
Pagmamahal natin tila'y nakikita
Dito sa retratong iyong nakuha.
Ilang sandali'y aking nagunita,
Ang araw nang tayo'y nagkakilala.
Ito ang retrato na tayo'y nagtipon,
At nagtawanan sa buong hapon.
Ang mga larawan nati'y aking inipon
At sinilid ko sa aking kahon.
Sa panahong lumipas,
Larawan nati'y 'di kumukupas.
At sa mga sandaling nakalipas,
Tayo'y magkasama hanggang wakas.
Maaari ito ang katapusan
Sa ating masasayang nakaraan.
Mananatili ito sa aking puso't isipan.
Subalit, ang tugon ko lamang ay "Paalam!"
(akda ni Ezar Co ~ Hunyo 15, 2018)
(binago ~ Agosto 5, 2019)
___________